תְהִלִּים 112
Hebrew Scriptures · Full chapter
1 הללו יה אשרי איש ירא את יהוה במצותיו חפץ מאד׃
2 גבור בארץ יהיה זרעו דור ישרים יברך׃
3 הון ועשר בביתו וצדקתו עמדת לעד׃
4 זרח בחשך אור לישרים חנון ורחום וצדיק׃
5 טוב איש חונן ומלוה יכלכל דבריו במשפט׃
6 כי לעולם לא ימוט לזכר עולם יהיה צדיק׃
7 משמועה רעה לא יירא נכון לבו בטח ביהוה׃
8 סמוך לבו לא יירא עד אשר יראה בצריו׃
9 פזר נתן לאביונים צדקתו עמדת לעד קרנו תרום בכבוד׃
10 רשע יראה וכעס שניו יחרק ונמס תאות רשעים תאבד׃
Public-domain scripture from Hebrew Scriptures. Published verse numbers and combined passages are preserved. Select a verse number to read it in the Scroll.