הוֹשֵׁעַ 3
Hebrew Scriptures · Full chapter
1 ויאמר יהוה אלי עוד לך אהב אשה אהבת רע ומנאפת כאהבת יהוה את בני ישראל והם פנים אל אלהים אחרים ואהבי אשישי ענבים׃
2 ואכרה לי בחמשה עשר כסף וחמר שערים ולתך שערים׃
3 ואמר אליה ימים רבים תשבי לי לא תזני ולא תהיי לאיש וגם אני אליך׃
4 כי ימים רבים ישבו בני ישראל אין מלך ואין שר ואין זבח ואין מצבה ואין אפוד ותרפים׃
5 אחר ישבו בני ישראל ובקשו את יהוה אלהיהם ואת דויד מלכם ופחדו אל יהוה ואל טובו באחרית הימים׃
Public-domain scripture from Hebrew Scriptures. Published verse numbers and combined passages are preserved. Select a verse number to read it in the Scroll.